Buiten sport- en kulturele aktiwiteite bied Eikestad ook aksies waaraan leerders vrywillig kan deelneem. Dít bou voort op ons kernwaardes – Omgee, Respek, Eerlikheid, Integriteit en Verantwoordelikheid.

Die skool bied tans die volgende Ko-Kurrikulêre aktiwiteite aan:

CSV

Ons staan in verwondering oor wat ons voor ons sien afspeel… die nuwe generasie  kinders is besig om as dissipels van Jesus opgerig te word! Weekliks stroom kinders na die gesamentlike byeenkomste en vergadering van omgee-groepe.  Mag Eikestad waarlik wees “Eike tot Sy Roem”.

CSV Byeenkomste
CSV word weekliks aangebied op ‘n Dinsdag tydens eerste pouse in die Aktiwitetsentrum.  Alle leerders is welkom!

Omgee Groepe
Al slaan ons, ons tentpenne wyd, bly dit belangrik dat elke hart versorg moet word en dat daar in elke kind fondasies ingebou moet word sodat elkeen kan leef as ‘n Ligdraer van Christus.  In vennootskap met die Groot Leermeester is omgeegroepies die ideale geleentheid vir gesamentlike groei. Waar ons mekaar aanmoedig om te wees dit wat Christus oor ons droom.  Omgee-groepe kom op Donderdae bymekaar tydens eerste pouse.  Verskillende onderwysers neem leiding vir die fasilitering van ‘n omgee-groepie.

Gebedsweek

Die fokus van die Gebedsweek hierdie jaar was die lig en die Heerlikheid van die Vader en was gebaseeer op die skrifgedeelte uit Jesaja 60:1-2.

Jes 60:1-2
“Staan op, Jerusalem, laat jou lig skyn sodat alle volke dit kan sien! Want die Here se heerlikheid skyn op jou. Duisternis kom oor die aarde, donkerte oor al die nasies, maar oor jou gee die Here lig, oor jou verskyn Sy teenwoordigheid”

Die Aktiwiteitsentrum is omskep in ‘n Gebedslokaal met verskillende aktiewe, kindervriendelike gebedstasies.  Hierdie stasies het die tema “In Sy Lig” op verskillende wyses uitgebeeld.

Ons harte is gevul met dankbaarheid na hierdie week.  Dit bly ‘n voorreg om te sien hoe kinders keuses maak wat van ewigheidswaarde is.

Verrykingsprogram

Die verrykingsprogram het in 2015 ’n aanvang in Laerskool Eikestad geneem as die ontwikkelingsprogram. Na afloop van 2015 het ons egter besluit om die naam te verander na die verrykingsprogram omdat dit ‘n beter beskrywing van die waarde daarvan is.

Hierdie program verryk kinders se lewens deur hulle die geleentheid te gee om vaardighede aan te leer wat hulle in die toekoms kan gebruik. Dit vereis ook dat leerders betrokke is by die skool en gemeenskap. Hulle lewens word dus verder verryk deur te gee aan die skool en die gemeenskap.

Die verrykingsprogram is ‘n vrywillige program waaraan graad 6-leerders kan deelneem. Dit is nie prestasiegedrewe nie, maar eerder daarop gemik om kinders lewensvaardighede aan te leer wat blywende waarde het. Dit bestaan uit drie afdelings naamlik:

  1. Selfontwikkeling – om iets nuuts te leer;
  2. Diens in die skool en gemeenskap;
  3. Ontwikkeling van organisatoriese vaardighede deur ’n geleentheid van hulle keuse te reël.